Əhmədli qəsəbəsi Abşeron yarımadasının cənub hissəsində, Bakı şəhərinin Xətai rayonunun ərazisində yerləşir.
Kəndin yaranma tarixinin birinci mərhələsi XI əsrin ortalarına, Səlcuq imperiyası dövrünə təsadüf edir. Səlcuq sultanı Toğrulun (1040-1063) hakimiyyəti zamanı Azərbaycan ərazisində məskunlaşmağa başlayan səlcuq tayfalarından bəziləri, məhsuldar torpaqlar axtararaq Abşeron yarımadasına, Əhmədli ərazisinə gəlib çıxırlar. Bu dövrdə kəndin necə adlanması bəlli deyil. [http://khatai-ih.gov.az/page/11.html]
İkinci mərhələ XVI əsrin əvvəllərində, Səfəvi hakimiyyəti dövründə başlayır. Məşhur səfəvi tayfalarından olan şahsevənlərdən Mahmud və Əhməd adlı iki varlı maldar qardaş öz tayfaları ilə birgə qış otlaqları tapmaq məqsədilə bu yerlərə gəlmiş, burada məskunlaşmışlar. Tezliklə əhali arasında hörmət qazanan böyük qardaş Əhmədin şərəfinə, kənd “Əhmədli” adlandırılır. Bununla razılaşmayan Mahmud böyük qardaşına qarşı çıxır və öz tayfasını ayıraraq kəndin digər hissəsinə köçürür. Sonralar bu iki hissə yenidən birləşir və kənd ağsaqqalları kəndin böyük qardaş Əhmədin adını daşımasına qərar verirlər. Lakin bəziləri buranı “Gulay-Mahmud” da adlandırırdılar. [http://khatai-ih.gov.az/page/11.html] [Фатуллаев-Фигаров Ш. С. Зодчество Апшерона. Баку-2013]
Bakı xanlarının dövründə Əhmədli kəndi Əmircan kəndinə tabe idi. Sovet hakimiyyəti illərində, 1936-cı ildə Əhmədli kəndi şəhər tipli qəsəbə statusunu alır.
Burada əvvəllər qəbiristanlıq olmayıb və yerli əhali Bülbülə və Keşlə kəndlərinin qəbiristanlıqlarından istifadə edib. Lakin bakılı Hüseynəli xanın dövründə ilk dəfə kənddə hörmətli şəxslərdən biri olan Ağaları dəfn ediblər. Bu vaxtdan kəndin öz qəbiristanlığı mövcuddur. Kənddə Ağaların tikililəri hələ də “Ağalar otağı” adlandırılır.
Kəndin minarəsiz məscidi 1904-cü ildə milyonçu Hacı Zeynalabdin Tağıyevin vəsaiti hesabına inşa edilib. Bundan əlavə, burada Hacı Əbu Talıb Əbu Turab oğlunun hamamı (1886-1887-ci il), Qasımova hamamı (1914) və başqa abidələr mövcud olub.
Tarixən kənd 9 məhəllədən ibarət olub: İmanqulu, Nəzər, Dağlı, Novruzlu, Cəfərli, Qart, Qacarlı, Dağarlı. Yerli əhali, əsasən, bostançılıq və kənd təsərrüfatı ilə məşğul olub.[Фатуллаев-Фигаров Ш. С. Зодчество Апшерона. Баку-2013]
1893-cü ilin statistik məlumatlarına görə, Əhmədlidə 503 sakin yaşayırdı. 1960-cı ilin məlumatına əsasən, əhalinin sayı 4.1 min nəfər olub. 2021-ci ildə Əhmədli qəsəbəsinin əhalisi 11 min nəfər təşkil edib. [Свод статистических данных о населении Закавказского края. Тифлис-1893];
[Баку за 40 лет в цифрах. Баку-1960];
[URIS id=77654]
