Bu gün məşhur reper Anar Cəbiyevin (Nağılbaz) doğum günüdür.
Anar Nağılbaz 1974-ci il, martın 28-də Bakıda keçmiş millət vəkili Rizvan Cəbiyevin ailəsində dünyaya gəlib. Atası onun jurnalist olmasını istəyirdi. Ancaq Anar öz istəyi ilə Mədəniyyət və İncəsənət Universitetinin televiziya rejissorluğu fakültəsinə qəbul olub.
1990-cı ildə rep karyerasına başlayıb. İlk dəfə Krımda “Artek” düşərgəsində rep deyib və Azərbaycanın ilk reperi kimi tarixə düşüb.
Anar bir müddət ədəbi yaradıcılıqla da məşğul olub. Nağıllar yazır və bu səbəblə də özünə Nağılbaz təxəllüsü götürür.
Anar Nağılbaz həm də teatr səhnələrində öz istedadını göstərib. Onun “Meşə nağılı” tamaşasında Mixail Qorbaçovu donuz, Azərbaycanı isə qurd obrazı kimi canlandırmağı tamaşaçılara həddən artıq maraqlı gəlmişdi. 1993–1995-ci illərdə “Naxçıvan" qəzetinin müxbiri olub.
Bundan başqa Anar Nağılbaz kino sahəsinə də daxil olub. Onun diplom işi sayılan “Bakı oğrusu” filmi konsertlərdən yığdığı pulların sayəsində ekranlaşdırılmışdı.
Anar Nağılbazın şəxsi həyatı da yaradıcılığı kimi xeyli müzakirə mövzusuna çevrilmişdi. Reper ilk dəfə 2000-ci ildə bir milyarderin qızı ilə nişanlanıb. Lakin bu münasibət uzun müddət davam etməyib. Hər iki tərəfin razılığı ilə nişan pozulub. Daha sonra Anjelika adlı bir xanımla sevgili olan Anar Nağılbaz onunla ailə qurmaq istəyir. Ancaq qızın ailəsi bu münasibətə razı olmur. Anjelikanın ailə üzvləri toy məclisində iştirak etmir. Anarla Anjelika bütün çətinliklərə baxmayaraq, evlənirlər. Təəssüf ki, daha sonra ailəni saxlamaq mümkün olmur. Anarın içkiyə qurşanması hər şeyi məhv edir. Anjelika iki övladını da götürüb Anarı tərk edir.
Reper 2015-ci ildə Azərbaycanı tərk edib Çexiyada mühacir həyatı yaşayıb. 2018-ci ildə yenidən vətənə qayıdan Anar Nağılbaz mediadan gizli şəkildə toy eləyir, Aytən adlı xanımla evlənir. Lakin bu səfər də onun ailə həyatı uğurlu olmur. Rəsmi nikahdan sonra Aytən xanım Anar Nağılbazı tərk edib Bakıdan gedir. Reperin anasının müsahibəsində dediyinə görə, onun gəlini xərçəng xəstəliyindən əziyyət çəkirmiş.
Üst-üstə ağır günlər yaşayan və ictimai qınağa məruz qalan Anar Nağılbaz 2017-ci ildə ağır psixoloji sarsıntı, stress keçirib. Bundan bir il sonra, 2018-ci ildə o, dünyasını dəyişib.
