Azərbaycan Milli Akademik Dram Teatrının aktyoru Əli Nur teatrda dava baş verməsi ilə bağlı səslənən iddialara münasibət bildirib.
Modern.az-a açıqlama verən aktyor qeyd edib ki, teatr rəsmi olaraq hər şeyi izah edib, teatrda heç bir davadan söhbət gedə bilməz.
"Niyə belə qələmə verirlər, bilmirəm. Ağ yalandır. Teatr dava yeri deyil, yaradıcılıq məkanıdır. Bədii Şuranın iclasında rejissor işi, aktyor oyunu haqqında mübahisə oldu. Yaradıcılıq işində mübahisə həmişə mümkündür. Xahiş edirəm, məni bir də bu məsələ ilə bağlı narahat etməyin. Belə şeyləri şişirtməyin. Teatrımızın uğurları haqqında yazın, biz də oxuyub sevinək" - deyə Xalq artisti sonda qeyd edib.
***
13:19
Əməkdar artist Mehriban Xanlarova Akademik Milli Dram Teatrının (“Azdrama”) səhnə arxasında əlbəyaxa dava ilə bağlı Bakuplus.az-a açıqlama verib.
Bildirib ki, bu savaşın, hücumun mərkəzində Mehriban Ələkbərzadə dayanır:
“O, “Azdrama”ya bədii rəhbər təyin olunandan bu yana teatrımızda sakitlik yoxdur. Hər gün bir narazılıq, bir intriqa, bir qalmaqal baş verir... Hər zaman bütün mübahisələrin, söz-söhbətlərin başında onun adı keçir. Aktyor bədii rəhbərin otağından ağlayaraq çıxırsa, bu artıq şəxsi eqonun sənətə zərbə vurmasıdır”.
“Həmin aktyorları sakitləşdirən yenə bizim direktorumuz İlham Əsgərov olur. İlham müəllim olmasa, bu günə qədər teatr tamam çökərdi. Lakin vəziyyət getdikcə ağırlaşır. Mehriban Ələkbərzadə fəaliyyətinin nəticəsi olaraq şəhid qızını təhqir edir, şəhid atasını döyülməyə məruz qoyur. Mehriban Ələkbərzadə vəzifəsindən dərhal azad edilməlidir”, - deyə M.Xanlarova fikrini tamamlayıb.
Nəzrin Vahid
***
11:29
Akademik Milli Dram Teatrının (Azdrama) səhnə arxasında əlbəyaxa dava baş verib.
Bu barədə Qaynarinfo.az-a sözügedən teatrın aktyorları məlumat verib.
Onların bildirdiyinə görə, davaya səbəb kənar teatrların aktyor və rejissorlarının Akademik Milli Dram Teatrına dəvət edilməsinə etiraz olub.
Dava teatrın bədii şurasının iclasında baş verib. Xalq artisti Əli Nur çıxışı zamanı başqa teatrdan dəvət olunan aktyor və rejissorlara etiraz edib. Aktyor deyib ki, "Azdrama"ya təsadüfi rejissorlar dəvət etmək olmaz və bununla bağlı fikrini təhlil edib. Mübahisə yaranıb və aktyorlardan bir neçəsi Əli Nurun üstünə hücuma keçərək ona yumruq atıblar.
Vəziyyətin dramatik həddə çatacağını görən Xalq artisti Sabir Məmmədov hadisəyə biganə qala bilməyib. Sabir Məmmədov və teatrın direktoru İlham Əsgərov dava edənləri qucaqlayaraq iclas otağından çıxardaraq hadisə yerindən uzaqlaşdırıblar.
Aktyorlaq bildirir ki, teatrın bədii şurasında belə hadisə 150 ildə ilk dəfə baş verib.
Xalq artisti Əli Nur baş verən hadisə ilə bağlı Respublika Prokurorluğuna şikayət edib. Hadisə araşdırılır.
