Səkkiz ildir yataqxanada yaşayan Vətən müharibəsi qazisi sentyabr ayında yeni mənzilə köçəcək. Bu haqda 11 avqust tarixində Report məlumat verib.
Səkkiz ildir Yasamal rayonunda yerləşən yataqxanada yaşayan Vətən müharibəsi iştirakçısı, III dərəcəli əlil Rüstəm Məmmədov Binəqədi rayonu, Xocəsən qəsəbəsində dövlət tərəfindən üçotaqlı mənzillə təmin olunub.
Qazi Vətən müharibəsində könüllü olaraq Xocavənd, Cəbrayıl, Füzuli rayonları, Hadrut qəsəbəsi uğrunda gedən döyüşlərdə iştirak edib və döyüşlərin birində kəllə-beyin travması və ayağından qəlpə yarası alıb.
“Hazırda müalicəm davam edir, heç yerdə işləmirəm, 300 manat Prezident təqaüdü alıram. Ailəmiz beş nəfərdən ibarətdir. Bəzi məişət əşyaları alıb yeni mənzilə köçməyi planlaşdırırıq", - deyə Məmmədov bildirib.
Rüstəm Məmmədov “Füzulinin azad olunmasına görə”, “Cəbrayılın azad olunmasına görə”, “Xocavəndin azad olunmasına görə”, "Döyüşdə fərqlənməyə görə" və “Vətən müharibəsi iştirakçısı” medalları ilə təltif edilib.
