Aptek müdirini və işçini bıçaqlayan şəxslərə hökm oxunub. Bu haqda 12 avqust tarixində Qafqazinfo məlumat verib.
Xətai Rayon Məhkəməsində CM-nin “Xuliqanlıq-silah qismində əşya tətbiq etməklə” maddəsi ilə ittiham olunan 25 yaşlı Mehdixan Ağayev və onun qayını Ramil Salmanova hökm oxunub. Mehdixan 2 il 6 ay, Ramil isə 2 il müddətinə azadlıqdan məhrum edilib.
Belə ki, bir neçə ay əvvəl Xətai rayonunda yerləşən “Natural” aptekdə çalışan Günel Ağayeva (şərti ad və soyad) özbaşına pos-terminal vasitəsilə gün ərzində 30.000-75.000 manat arası dəyərində satılmamış mallar olmaqla ümumi 670.000 manat dəyərində satış çekləri çıxarıb. Sonra isə proqramla həmin çeklərin ƏDV-nin müəyyən edilmiş hissəsini geri qaytarıb. Bunu bilən aptek müdiri satıcını çağıraraq məsələni araşdırmaq istəyib və onun telefonunu yoxlayıb. Günel isə ifşa edildiyini başa düşüb və telefonu götürmədən aptekdən qaçıb.
Bundan 1 gün sonra aptek müdiri işə gəldikdən sonra Günelin həyat yoldaşı Mehdixan və qardaşı Ramil oraya gəliblər. Azər həmin şəxslərə bildirib ki, Günel etdiyi hərəkətə görə 8 min manat qaytarsa, məsələ bağlanacaq. Lakin həmin şəxslər israrla Günelə məxsus olan “Samsung” markalı telefonu tələb ediblər və münaqişə yaradıblar. Dava zamanı onlar aptek müdirinə və onun otağında olan Natiq adlı şəxsə bıçaqla xəsarətlər yetirərək qaçıblar. Yaralılara ilkin tibbi yardım göstəriləndən sonra onlar xəstəxanaya yerləşdiriliblər.
