Sabunçu rayonu, Bakıxanov qəsəbəsində yeni asfaltlanmış yol sakinlərə problem yaradıb. Bu haqda 12 avqust tarixində Bakı gündəliyi Facebook səhifəsi məlumat verib.
Belə ki, bir il əvvəl Bəşir Bünyadov küçəsində yol təmir olunub, hamar asfalt örtüyü salınıb. Bu da dərhal "adrenalin həvəskarları" olan sürücülərin marağını cəlb edib. Sakinlər deyirlər ki, bu yol sürücülərə “avtoşluq” etməyə şərait yaradır.
Təmirdən sonra yolda ("Koroğlu" metro stansiyasından Bakıxanov dəmiryol stansiyası istiqamətində) kifayət qədər piyada keçidi yaradılıb, lakin burada nə sürət limiti qoyulub, nə də radar quraşdırılıb.
"Bu yolda piyadaların təhlükəsizliyi sıfır səviyyəsindədir, avtomobillər bəzən əks yola çıxırlar. Bu problemlə bağlı aidiyyəti üzrə qurumlara məlumat vermişik, lakin hər hansı bir tədbir görülməyib", - sakinlərdən biri bildirib.
