Xəzər rayonu, Binə qəsəbəsinin “Dəmiryol” adlanan ərazisini içməli su ilə təmin edən magistral su kəmərinə müdaxilə edilib. Bu haqda BakuPlus.az “Azərsu” ASC-yə istinadən bu gün, 15 avqust tarixində xəbər verir.
Ərazidə fərdi yaşayış evinin tikintisi ilə məşğul olan Nasir adlı şəxs 219 mm diametrli Binə sovxoz magistral su xəttinin yerini özbaşına dəyişməyə cəhd edib.
O, gecə saatlarında magistral su kəmərinin siyirtməsindən su təchizatını dayandıraraq mövcud kəmərin 70 metr uzunluğunda olan hissəsini kəsib və tikinti sahəsindən kənara çıxararaq 159 mm diametrli polietilen borularla yeni xətt çəkib. Həmin şəxs elə gecə saatlarında həmin ərazidə fərdi yaşayış evi tikməyə başlayıb.
Magistral su kəmərinə müdaxilə nəticəsində ərazidə yerləşən cəzaçəkmə müəssisəsi, beşmərtəbəli yaşayış binaları və fərdi yaşayış evləri susuz qalıb.
“Azərsu” Xəzər Sukanal İdarəsi, rayon icra hakimiyyəti və hüquq-mühafizə orqanlarının birgə araşdırmaları nəticəsində həmin ərazidə fərdi yaşayış evinin tikintisinə dair vətəndaşın heç bir sənədinin olmaması və tikinti işlərinin qeyri-qanuni aparılması müəyyən edilib.
Hüquq-mühafizə orqanları əməkdaşlarının iştirakı ilə “Azərsu” ASC-nin briqadaları və texnikası vasitəsilə tikinti sökülüb. Hazırda sökülmüş kəmərin və su təchizatının bərpası istiqamətində işlər aparılır. Bu müddətdə cəzaçəkmə müəssisəsi, bina və fərdi yaşayış evlərinə alternativ vasitələrlə suyun verilişi təmin edilir.
Faktın araşdırılması ilə bağlı “Azərsu” hüquq-mühafizə orqanlarına müraciət edib.
