“Bir dəli quyuya daş atdı, yüz ağıllı çıxarda bilmədi”. Son günlər bu atalar misalını tez-tez xatırlamalı oluruq. “Şərur" MTK-nın sədri, "Şərurlu İsfəndiyar" kimi tanınan iş adamı İsfəndiyar Axundov gündəmi zəbt edib. Onun müsahibə zamanı səsləndirdiyi bəzi fikirlər ictimaiyyətdə kəskin reaksiyalara səbəb olub. Hərçənd "Şərurlu İsfəndiyar", əslində, qeyri-adi və yeni heç nə deməyib. Onun bisavad, hətta hərf tanımadığını əzəldən də bilirdik. Dünyagörüşünün dayazlığı da sirr deyildi. Bəlkə, özünü “çoban” adlandırmağı bir qədər yeni oldu. Və ya ixtiyarı olacağı təqdirdə bütün məscidləri sökdürüb yerində məktəb tikdirmək planları qəribə səsləndi. Amma ümumilikdə bu insanı Azərbaycanda tanımayan, onun qabında olduqlarına (ya olmadıqlarına) bələd olmayan birisini tapmaq çətindir.
O zaman, cənablar, bu saçyoldu, üzcırma və sinəvurma nə mənədir? Axı mövzu o mövzu deyil. "Şərurlu İsfəndiyar"ı hansı prinsipləri əsas tutub müsahib seçmisiniz? Pulu çoxdur, xub. Sonra... Sonra – heç nə. Yəni, müsbət mənada heç nə. Mənfilərini axtarmağa qalxsaq, o başqa məsələ. Ancaq mənfi xüsusiyyətlərə görə də müsahib seçilib gündəmə gətirilməz. “Hayp” tutmaq istəyirsinizsə (bu daha çox inandırıcı görünür) – o başqa. Bu baxımdan "Şərurlu İsfəndiyar"ın hansısa mətbu orqanında müsahib kimi görüntülənməsi təəccüblü deyil. Əsla! Təəccüblü onun söylədiklərinə ciddi-ciddi verilən reaksiyadır! Biri deyir qalmışıq çobanın əlində, biri deyir məktəb tikmək üçün məscid sökmək mütləq deyil, biri ritorik sual verir ki, neçə təhsil ocağı tikdirmisən indiyə kimi... Cənablar, bir qədər ciddi olmağın zamanı çatmayıbmı? Axı indiyə qədər "Şərurlu İsfəndiyar" dəfələrlə medianın diqqətinə düşüb. Ancaq hansı mətləblərlə? Məsələn, illər öncə iş adamının oğlunun universitetə 650 min dollarlıq maşınla getməsi barədə xəbərlər yayılaraq müzakirələrə səbəb olmuşdu. Daha sonra biznesmen özü də bu faktı təsdiqləmişdi: "Lamborghini" də var, "Ferrari" də, lap hələ "Bentley" də. Cavan adamdır. İstəyir, sürsün də. Biz işləyirik və qazanırıq. Mənim özümün də maşınım "Lexus"dur”. Daha sonra tikinti maqnatının oğlanları Allahverdi və Şahin Axundovlar sosial şəbəkələrdə “200” seriyalı lüks maşınların fotolarını paylaşaraq gündəmə gəlmişdilər. Qardaşların “Bentley” kolleksiyası daim mətbuatın diqqətində olub. Onların içərisində “Lamborghini Aventador”, “Ferrari 458 Speciale”, “Mercedes”, “Maseratti”, “Audi” və qeyd etdiyimiz kimi, “Bentley” vardı. Bu maşınların start qiyməti 300 mindən başlayır və 800 minə kimi qalxır. Bax, belə xəbərlər – hə, "Şərurlu İsfəndiyar" simasına, adına uyğun bir şeylərdir. Yoxsa ki, hərf tanımayan, özünü “çoban” adlandıran biri ilə qalxıb hansısa uca mətləblərdən, mənəvi çalarlardan, hansısa ruhani hissiyyatlardan danışmaq, söhbəti bu səmtə aparmaq, ondan az qala Eynşteynin Nisbilik Nəzəriyyəsini “ne prav” çıxarmağı, Cəlaləddin Ruminin “Məsnəvi”sini kölgədə qoyacaq əsər yaratmağı, Hacı Zeynalabdin Tağıyevi mesenatlıqda ötəcəyini gözləmək... Yaraşmır axı, yaraşmır. Nə özünü media kimi təqdim edənlərə, nə də, elə "Şərurlu İsfəndiyar"a. Gəlin əndazəni aşmayaq. Kiminsə pulu var deyə onu insanlığın etalonu, elita nümayəndəsi və cəmiyyətin qaymağı kimi təqdim edib, qarşımızdakından da müvafiq davranış gözləməyək, onda, əslində, ona yad olan, onda heç zaman olmayan və ola bilməyəcək xüsusiyyətlər axtarmayaq. Ağa ağ, qaraya qara deyə bilmiriksə, heç olmasa susaq. Bizi ki dilimizdən heç kim dartıb məcbur etmir.
Sara Məmmədli
