Ötən gün dövlət başçısı 2025-ci il Gənclər üçün Prezident mükafatlarının verilməsi haqqında Sərəncam imzalayıb.
Qafqazinfo.az xəbər verir ki, mükafata layiq görülmüş gənclərin sırasında AMEA Arxeologiya və Antropologiya İnstitutunun elmi işçisi və doktorantı Ağalarov Mircavid Elşad oğlu da yer alıb.
O, 2020-ci ildə Azərbaycan Universitetinin Humanitar fənnlər fakültəsinin magistr pilləsinə daxil olub. 2022-ci ildə isə AMEA Arxeologiya və Antropologiya İnstitutunun əyani doktoranturasına qəbul olub, “Azərbaycanın Arxeoloji irsində Səlcuq dövrü fayans məmulatı” adlı fəlsəfə doktoru dissertasiyası üzrə tədqiqata başlayıb. 2023-cü ildən isə İnstitutun Elmi fond və ekspozisiya şöbəsində yarımştat olaraq fəaliyyətə başlayıb, hazırda da həmin şöbənin elmi işçisidir.
Mircavid Ağayevin arxeologiya elminə marağı tələbə vaxtlarından yaranıb, 2017 və 2018-ci illərdə Oksford Universiteti ilə Moskva Dövlət Universitetinin Bakı filialının birgə layihəsi olan AEB2017 və AEB2018 (Bərdənin Arxeoloji tədqiqi) layihələrində, eyni zamanda arxeologiyaya aid müxtəlif beynəlxalq elmi tədbirlərdə iştirak edib, “Erasmus+” layihəsinin iştirakçısı olub. Arxeologiya və Antropologiya İnstitutuna qəbul olduğu gündən isə İnstitutun təşkil etdiyi müxtəlif ekspedisiyalarda elmi heyət üzvü olub.
M.Ağayev Vətən müharibəsi nəticəsində azad olunmuş bölgələrdə, əsasən Ağdam rayonundakı Çinartəpə çoxtəbəqəli qədim yaşayış yeri və Zəngilan rayonunda yerləşmiş Şəhri-Şərifan şəhər yeri də daxil olmaqla 11 fərqli çöl tədqiqatının iştirakçısı olub.
2022 və 2024-cü illərdə Azərbaycan-Almaniya birgə layihəsi olan LKREP( Qarabağ Düzənliyinin tədqiqi və qazıntısı) layihəsində, YUNESCO-nun İpək yolu Onlayn Platform proqramının “Gəncənin IX-XV əsrlər şirli keramikası” adlı elmi layihədə, Avropa Birliyinin COST proqramının Gametable layihəsində iştirak edib, hazırda da bir neçə layihənin iştirakçısıdır. O, ABŞ, İngiltərə, Fransa, Türkiyə, Rusiya, Qırğızıstan, Qazaxıstan daxil olmaqla dünyanın müxtəlif ölkələrində keçirilən konfranslarda Arxeologiya və Antropologiya İnstitutunu təmsil edib.
İxtisasını, xarici ölkələrdə keçdiyi ixtisas təkmiləşdirmə kurslarını, əldə etdiyi təcrübələri, apardığı uğurlu araşdırmaları, arxeologiya elminə olan həvəsini və elmi səviyyəsini nəzərə alaraq, AMEA rəhbərliyi Ağalarov Mircavid Elşad oğlunu namizədliyini Gənclər üçün Prezident Mükafatına təqdim edib.
Gənc arxeoloqun mükafata layiq görülməsi Prezident İlham Əliyevin arxeologiya elminə olan diqqətinin və qayğısının bariz göstəricisidir.
