Bu gün Azərbaycan SSR əməkdar incəsənət xadimi, şair Tofiq Mütəllibovun doğum günüdür.
Bakuplus.az xəbər verir ki, nəğməkar şair, əməkdar incəsənət xadimi Tofiq Mütəllibov 1929-cu il aprel ayının 13-də Naxçıvan şəhərində ziyalı bir ailədə anadan olub. Tofiq Mütəllim oğlu Mütəllibov orta təhsilini doğma şəhərdə aldıqdan sonra Bakıya gəlib, burada Azərbaycan Dövlət Universitetində təhsilini davam etdirib.
"Pioner" jurnalında məsul katib, Televiziya və Radio Verilişləri Komitəsində redaktor, baş redaktor, "Azərbaycan pioneri" qəzetində şöbə müdiri vəzifəsində çalışıb. Sonra isə "Azərbaycan gəncləri" qəzetində işə başlayan Tofiq Mütəllibov ömrünün sonuna kimi burada çalışıb. Ötən əsrin 50-ci illərindən şair kimi diqqət çəkən Tofiq Müttəlibov 30-a yaxın kitabın müəllifidir, 300-dən çox şeirinə mahnı bəstələnib.
Tofiq Mütəllibov bəstəkar Qənbər Hüseynli ilə birlikdə Azərbaycan musiqisinə "Cücələrim" mahnısını bəxş edib. "Cücələrim"in 60-dan çox yaşı var. Mahnının mətni bir çox xalqların dillərinə tərcümə olunaraq ifa edilib. Tofiq Mütəllibov uşaqların psixologiyasını çox yaxşı bildiyinə görə qələmindən çıxan şeirlər dillər əzbərinə çevrilib. Əsərləri bir sıra teatrlarda səhnələşdirilib.
Görkəmli şair 1992- ci il oktyabr ayının 30-da Bakıda vəfat edib.
