Bakı şəhərinin mərkəzində, Xətai rayonu, Afiyəddin Cəlilov küçəsi, 6A ünvanda yerləşən dəniz mənzərəli bina sökülmək üzrədir. Bina inşa olunaraq 2003-cü ildə təhvil verilib. 11 mərtəbəli, 33 mənzilli binada məskunlaşma da o ildən başlayıb. Bu gün isə sözügedən binanın söküntü işləri aparılır. Bu haqda 10 avqust tarixində Real TV reportaj çəkib.
Binanın söküləcəyindən ötən ilin noyabr ayından məlumatlı olduqlarını deyən sakinlər, onlara təklif olunan şərtlərlə razılaşmırlar. Dediklərindən belə başa düşülür ki, binanın sökülməsi müqabilində onlara təklif olunan məbləğ olduqca aşağıdır.
Bəzi sakinlər, söküntü işlərinə baxmayaraq, binada yaşamağa məcbur olduqlarını deyirlər. Elə 10-cu mərtəbədə yaşayan 78 yaşlı Cəmilə Məmmədova da təklif olunan şərtlərlə razılaşmayanlardandır. Hər gün təhlükəli şəraitdə aşağı qalxıb düşməsinə baxmayaraq, o, evini tərk etməyəcəyini və ona təklif olunan kompensasiya məbləğinin şəhərin mərkəzində dəniz mənzərəli ev almağa imkan vermədiyini bildirdi.
Əvvəllər bu ünvanda yerləşən qeyri-yaşayış obyektləri artıq ərazidən köçürülüb. Eləcə də binada yaşayan ailələrin əksəriyyəti də onlara təklif olunan məbləği alaraq buradan köçüblər. Ərazinin aid olduğu Xətai Rayon İcra Hakimiyyətindən (RİH) isə bildirirlər ki, Afiyəddin Cəlilov küçəsi, 6A ünvanındakı bina yaxınlığında salınması planlaşdırılan kompleksin tikintisinə mane olduğundan mütləq şəkildə sökülməli idi.
“Dövlət tərəfindən həmin binada hesablama işləri aparılmış və kompensasiya ödənilərək 32 mənzildən 24-ü köçürülmüş, və, eyni zamanda 4 qeyri-yaşayış obyekti tam olaraq köçürülmüşdür. Bu da o deməkdir ki, həmin binanın bir çox hissəsi kompensasiya ödənilərək həmin binadan köçürülmüşdür. Bildiyiniz kimi, həmin binanın ətrafında şəhidlərimizin xatirəsini əbədiləşdirmək üçün Zəfər kompleksi tikiləcək və bu da Bakı şəhərində yaşayan insanların vətənpərvərlik ruhunun yüksəlməsi üçün mühüm bir rol oynayacaq”, - deyə Xətai RİH-nin şöbə müdiri Anar Tağızadə bildirib.
