Abşeron Rayon Məhkəməsində talama məqsədi olmadan qanunsuz olaraq avtomobil ələ keçirmədə təqsirləndirilən Mehman Dəmirovun (soyadı şərti) cinayət işi üzrə məhkəmə istintaqı yekunlaşıb.
Pravda.az-a xəbər verir ki, hakim Vaqif Həsənovun sədrliyi ilə keçirilən prosesdə hökm oxunub.
Məhkəmənin hökmü ilə Mehman Dəmirova 2 il müddətinə azadlığın məhdudlaşdırılması (elektron qolbaq) cəzası təyin edilib.
İttihama görə, hadisə 2023-cü il dekabrın 9-da saat 6 radələrində Abşeron rayonu, Ceyranbatan qəsəbəsində qeydə alınıb.
Belə ki, maşın ustası (rəngsaz) olan Mehman Dəmirov rənglənməsi üçün avtomobil təmiri emalatxanasında saxlanılmış zərərçəkmiş Qalib Qayıbova (şərti) məxsus "KIA Sportage" maşınını talama məqsədi olmadan ələ keçirərək qaçırıb. O, Ceyranbatan qəsəbəsindəki küçələrin birində idarəetməni itirərək qaçırdığı avtomobili yolun kənarında daş betona vurub. Nəticədə zərərçəkmiş şəxsə 17 760 manat məbləğində (xeyli miqdarda) ziyan dəyib.
Hadisədən sonra Mehman Dəmirov saxlanılaraq cinayət məsuliyyətinə cəlb edilib.
