Cari ilin yanvar ayında bağlandığı bildirilən “AzərSuTikinti” xəstəxanasında hələ də bəzi şöbələr fəaliyyət göstərir. Bu haqda bu gün, 3 oktyabr tarixində Bakuplus.az AzTV-yə istinadən məlumat verir.
Xəstəxanadan yayılan məlumatların birində qeyd olunur ki, yanvar ayının 18-i nevroloji, terapiya, qəbul, reanimasiya, laboratoriya şöbələri Nizami Tibb Mərkəzinin yeni binasına köçürüləcək və fəaliyyətini orada davam etdirəcək. Amma bu günədək bir nəticə yoxdur. Üstəlik xəstəxanada antisanitar vəziyyət hökm sürür. Burada hemodializ, laboratoriya və qəbul şöbələri fəaliyyət göstərir.
Nizami Tibb Mərkəzi Publik Hüquqi Şəxsin ictimaiyyətlə əlaqələr üzrə mütəxəssisi Gülnar Yaşarlı məsələ ilə bağlı açıqlama verib: “Baxarkən də bilinir ki, həmin xəstəxanada cari və əsaslı təmir işləri aparılmayıb. Xəstəxana TƏBİB publik hüquqi şəxsin idarə heyətinin 27 aprel 2021-ci il tarixli qərarına əsasən, Nizami Tibb Mərkəzinin strukturuna daxil olduqdan sonra xəstəxanada mövcud şəraitlə əlaqədar fəaliyyət göstərən cərrahi profilli çarpayılar, o cümlədən cərrahi, lor, ginekoloji otaqların fəaliyyətinin davam etdirilməsi məqsədəuyğun hesab edilməmişdir. Həmin sahələr üzrə xəstələrin qəbulu aparılmır”.
