Məsələ ilə bağlı Respublika Pediatriya Mərkəzi sorğumuzu cavablandırıb.
Bildirilib ki, mərkəzin strukturuna daxil olan tibb müəssisələrində iş normativləri Azərbaycan Respublikasının Əmək Qanunvericiliyinə uyğun olaraq tənzimlənir.
“Reanimasiya və Təcili Təxirəsalınmaz Tibbi Yardım şöbələrində fasiləsiz tibbi xidmətin təmin edilməsi məqsədilə əməkdaşlar 12 saatlıq növbəli iş rejimi ilə fəaliyyət göstərirlər. Digər şöbələrdə isə çoxnövbəli iş qrafiki tətbiq edilir.
Azərbaycan Respublikasının Əmək Qanunvericiliyinə uyğun olaraq həftəlik və aylıq normativ iş saatları aşılmır. Mərkəzimiz tibbi heyətin hüquqlarına hörmət edir və əmək şəraitinin qanunvericiliyə tam uyğun formada tənzimlənməsini təmin edir”, - deyə qurumdan bildirilib.
***
17:46
Bakıda Respublika Pediatriya Mərkəzinin əməkdaşlarının iş saatı artırılıb.
Bakuplus.az-ın əldə etdiyi məlumata görə, tibb işçilərinin iş saatı artırılaraq günaşırı işləmək şərti ilə 12 saata qaldırılıb.
Buna səbəb kimi texniki işçilər və tibb bacılarının sayının az olması göstərilir.
Qeyd edək ki, keçmiş adı Əbülfəz Qarayev adına 2 saylı Kliniki Uşaq Xəstəxanası olan səhiyyə ocağında əvvəllər belə problemlərin olmadığı deyilir. Hazırda isə müdiriyyət və qurum dəyişdiyi üçün belə vəziiyət yaranıb.
Məsələ ilə bağlı Vətəndaşların Əmək Hüquqlarının Müdafiəsi Liqasının sədri Sahib Məmmədov deyib ki, həftəlik iş saatı 40-ı keçməməlidir:
“Əgər iş saatını həftəlik tənzimləmək mümkün deyilsə, ay ərzində iş günləri 8 saat normasına vurulur. Aylıq iş saatı 167-ni keçməməlidir. İllik 167 saat da 12 -yə vurulur.
Tibb müəssisələrində belə hallar olur. Əsas odur ki, iş vaxtından artığına yol verilməsin. Verilsə, Əmək Məcəlləsinə uyğun olaraq əlavə ödəniş sistemi ilə tənzimlənməlidir”.
Məsələ ilə bağlı Respublika Pediatriya Mərkəzi ilə əlaqə saxlasaq da, səhiyyə ocağının əməkdaşları sualımızı cavablandırmaqdan yayındılar.
Əsmər Sənani
