Sevda və Emma Ələkbərzadə bacıları ARB televizisiyasında yayımlanan “Günə bax” verilişinin qonağı olublar.
Bakuplus.az xəbər verir ki, ifaçılar sənətə necə gəldiklərini və bu yolda atalarının onlara qoyduğu qadağalardan danışıb.
“Atam icazə vermirdi oxumağıma. O vaxtları bir az çətin idi. Hər ailədə razı olmurdular. Atam da sənət adamı idi. Gözəl səsi olub, musiqi sevən insan olub. Mən, bacım və anam bir-birimizə qoşulub nə qədər ağladıq, yalvardıq. Dedim, mən oxumasam yaşaya bilmərəm. Mən də evdə bütün günü oxuyurdum. Bir gün kişi qapını açıb “Yox, Allah qızıma istedad verib. Mən bunu onun əlindən ala bilmərəm” dedi. Başa düşdü ki, mən tanınmaq üçün yox, sənəti sevirəm deyə səhnəyə çıxıram”, - deyə S.Ələkbərzadə bildirib.
