“Əmircan-Bülbülə tərəfdən gələn nəqliyyat axını zamanı dayanacaqda 2-3 avtobus saxlayanda, həm də dəmiryolundan qatar keçəndə burada aləm bir-birinə dəyir. Yollar bərbad günündədir”.
Bunu Bakuplus.az-a müraciət edən Bakı sakini bildirib.
Söhbət Sabunçu rayonu, Yavər Əliyev küçəsi, dəmiryolu istiqamətində olan üçtərəfli yoldan gedir.
Məlumata görə, yolda insanlar üçün normal piyada keçidi belə yoxdur.
“Yolun sağı və solu hündür bordürlərdir. Yaşlı, uşaqlı və fiziki qüsurlu insanlar buradan necə gedib-gəlsin? Piyada zolağı yoxdur. 2-3 bildiriş lövhəsi var. Ona isə sürücülər əməl etmir. Sabah orada hər hansı bir bədbəxt hadisə baş versə, ölən olsa, nə AYNA, nə də AYDAA yaxın duran deyil. Uzaq duracaqlar. Günahı vətəndaşda görəcəklər. Bütün müvafiq qurumlara dəfələrlə müraciət etmişəm. Cavab yazan yoxdur. AYNA yalandan deyir iş gedir, ancaq ortada heç nə yoxdur”, - deyə şikayətçi bildirib.
Şikayətçinin sözlərinə görə, keçidin sol tərəfini bəziləri ayaqyoluna çeviriblər və buna görə də pis qoxudan ora yaxın durmaq olmur.
Məsələ ilə bağlı Azərbaycan Yerüstü Nəqliyyat Agentliyinə(AYNA) sorğu ünvanlamışıq.
