Xəbər verdiyimiz kimi, dünən Bakıda dəhşətli yol qəzası baş verib. “BYD” markalı avtomobil sürətlə hərəkət edərək Heydər Əliyev prospektinin kənar yolunu kəsən beton maneəni dağıdaraq yolun əsas hissəsinə düşüb. Hər kəsin dəhşətlə izlədiyi qəza görüntüləri sosial şəbəkələrdə geniş müzakirə olunur.
Amma ən çox müzakirə olunan və qınanılan isə “Embawood” şirkətinin bədbəxt hadisənin görüntüsü üzərindən özünü reklam etməyə çalışmasıdır.
Qeyd edək ki, mebel satışı ilə məşğul olan şirkət qəzadan görüntüləri montaj edərək “Belə sürətlə, həm də təhlükəsiz - sifarişiniz ən qısa zamanda qapınızda!” başlığı ilə paylaşıb.
Mövzu ilə bağlı bizim.media şirkətlə əlaqə saxlayıb.
“Embawood”un Rüstəm adlı əməkdaşı absurd açıqlama verib. O, məsələnin araşdırıldığını və bir neçə günə, daha dəqiqi, gələn həftəyə açıqlama veriləcəyini deyib.
“Niyə bu qədər gec? Nəyi araşdırırsınız, reklamdan şirkət xəbərsiz olub?” sualına isə əməkdaş çox “nəzakətlə” cavab verib:
“Bizim işimizi bizə öyrədirsiniz? Məlumatı gözləyin!”
