Qrip virusu əhali arasında hər il geniş yayılan bir xəstəlikdir. Bu virus əsasən hava yolu ilə yayılması və insanlardan insana keçməsi ilə tanınır. Qripin əlamətləri arasında yüksək hərarət, boğaz ağrısı, öskürək, əzələlərdə ağrı və halsızlıq yer alır.
Virusun yayılması xüsusilə qış aylarında daha çox olur. Lakin yaz ölkəmizə daxil olandan insanlar arasında bu xəstəliyə tez-tez rast gəlinir. Son zamanlar bir çox bölgədə qrip virusu və oxşar tənəffüs yolu infeksiyaları yenidən artmaqdadır. İnsanlar arasında qızdırma, titrətmə, boğaz ağrısı, öskürək, bəzən də bədən ağrıları və yorğunluq kimi əlamətlərlə müşayiət olunan hallar geniş yayılıb.
Bunu yaz aylarında yayılan mövsümi viruslarla ilə əlaqələndirirlər. Bildirilir ki, yazda havaların dəyişkənliyi bədənin müdafiə sistemini zəiflədir, bu da viruslara yoluxmanı asanlaşdırır.
Bəs, görəsən, bununla bağlı hansı tədbirlər görülməlidir? Yayılan xəstəlik yaz virusu hesab oluna bilərmi?
Mövzu ilə bağlı Bakuplus.az-a açıqlama verən terapevt Abbas Bağırovun sözlərinə görə, orqanizmin dəyişkən təbii proseslərə uyğunlaşma qabiliyyəti pozulduqda bədənin ətraf mühitə qarşı həssaslığı dəyişir:
“Havaların kəskin dəyişməsi, yəni istiləşməsi və ya soyuqlaşması canlı orqanizmlərin hamısına - həm bitki aləmində, həm insanlarda müəyyən dəyişikliklərə səbəb olur. Havaların qeyri-stabil keçməsi orqanizmin uyğunlaşma qabiliyyətinin pozulmasına gətirib çıxarır, bədənin proseslərə həssaslığı dəyişir. Bu hal immun sistemin zəifləməsinə şərait yaradır.
İkinci - ekoloji sistemdə baş verən çirklənmə halının artmasıdır. Burada obyektiv və digər faktorlar var. Dünyada gedən müharibələr nəticəsində baş verən partlayışlardan sonra zəhərli qazların artması atmosfer havasını çirkləndirir. Bu zaman ağciyərlərə gedən zərərli qazlar artır və bütün toxumalara yayılır. Həmçinin insanlar ekoloji təmiz qidlanmalardan uzaqlaşdıqca, bu da immun sistemin zəifləməsinə səbəb olur. Koronovirusdan sonrakı dövrdə orqanizmin immun sistemində gedən adekvat dəyişikliklər bir çox xroniki xəstələrdə və meteohəssas insanlarda immun sistemini zəiflətdi”.
İnfeksionist Mərdan Əliyev isə qeyd edib ki, əslində kəskin respirator virus infeksiyalarına, qripə payız-qış mövsümündə daha çox rast gəlinir:
“Yaz aylarında bir qədər azalır. Mart ayı qripin mövsümüdür. Çox rast gəlinir və ağır gedir. Sonradan havaların istiləşməsi ilə əlaqədar azalmağa başlayır. Aprelin əvvəlləridir. Virus infeksiyası azalıb, lakin hələ də bu xəstəlik müəyyən yerlərdə qalıb. Kim qrip virusuna yoluxan şəxs ilə təmasda olursa, onlar yoluxurlar. Təmasda olmayanlar yoluxmurlar.
İmmun sisteminin zəif olması bu xəstəliyə tez yoluxmağa səbəb olur, ağır gedişata gətirib çıxarır. İnsanlarda yuxu sisteminin pis olması, gec yatması, səhər gec oyanmaq da orqanizmə mənfi təsir edir. Düzgün qidalanmamaq da immun sistemini zəiflədir, vitamin çatışmazlığı vəziyyəti ağırlaşdırır”.
Nəzrin Vahid
