Azərbaycan Dövlət YUĞ Teatrında nümayiş olunan “Asılqan” tamaşası zamanı aktyor Elşən Əsgərovun tamaşaçılardan üzr istəyərək səhnəni tərk etdiyi barədə xəbər vermişdik.
Bu məsələ sosial şəbəkələrdə müzakirələrə səbəb olub, aktyorun bu hərəkəti teatrın hazırda binasız qalmasına etiraz kimi qəbul edilib.
Aktyor qeyd edib ki, tamaşanı hər hansı zədəyə görə yarımçıq qoymayıb. O vurğulayıb ki, bir insan, bir aktyor kimi bu, artıq onun üçün son hədd olub.
Məsələ ilə bağlı qafqazinfo.az Elşən Əsgərovun özü ilə əlaqə saxlayıb: “YUĞ teatrı yaradıcı və texniki heyət baxımından üzərinə düşən bütün tapşırıqları yerinə yetirməyə hazırdır. Bütün heyət YUĞ-un yaşaması, fəaliyyətini davam etdirməsi üçün bir ailə, bir yumruq kimi vəhdətdədir. YUĞ məkan və şəraitsizlikdən əziyyət çəkir”.
Baş verənlərlə bağlı tamaşanın rejissoru Əbdülqəni Əliyevin də mövqeyi öyrənilib. O, açıqlamasında bildirib ki, bu, etiraz məsələsi deyil:
“Burada heç kimi qınamaq olmur, nə aktyoru, nə teatrın rəhbərliyini, nə də bizim olduğumuz Kukla Teatrını... Çünki Kukla Teatrında müvəqqəti, 1-2 ay adı ilə artıq 10 ilə yaxındır ki, fəaliyyət göstəririk. Hər yeni mədəniyyət naziri gələndə deyir ki, “artıq düzələcək, biz sizə bina verəcəyik”. Artıq buna öyrəşmişik. Hətta gözlənilir ki, bu teatr şəraitsizlikdən məhv olsun. Uşaqlar isə hər dəfə təzə-təzə tamaşalar hazırlayırlar. Hər təzə tamaşa da yeni dekorasiya deməkdir. Bütün bunları qoymağa da artıq yer yoxdur. Koridorlara düzülür. Sağ olsun Kukla Teatrı ki, 10 ildir bizə dözür. Kulis arxasında əslində yer böyük olmalıdır. Burada heç bir metr yoxdur və dekorasiyalar da qoyulanda, bir də görürsən qaranlıqda qolu, başı, ayağı dəyir. Bilirsiniz ki, bizdə bir aktyor bir neçə obrazı canlandırır və bunun üçün saniyələr lazımdır ki, səhnə arxasına keçib dəyişsin. Bu zaman da o, səhnə arxasındakı dekorlara dəyir. Bir dəfə, iki dəfə, üç dəfə... axırda dedi ki, “yox, belə alınmır”. Düzdü, ayağı sınmadı, kəsilmədi, amma dözülməz həddə çatdı”.
Məsələ ilə bağlı Mədəniyyət Nazirliyinə də sorğu ünvanlanıb.
Qeyd edək ki, YUĞ teatrının binası 2016-cı ildə sökülüb. Teatr binasız qalması səbəbindən tamaşalarını Azərbaycan Dövlət Kukla Teatrının kiçik məşq zalında göstərməli olur.
