Azərbaycanlı idmançı Ruslan Lunyov Portuqaliyanın Lissabon şəhərində 23-25 sentyabr tarixlərində keçirilən Avropa kubokunda standart tapançadan 25 metr məsafəyə atəşaçmada qızıl, həmçinin odlu silahdan atəşaçmada gümüş medal qazanıb. Bu haqda 26 sentyabr tarixində Bakuplus.az məlumat verir.
Lapua Avropa Kuboku Avropa Atıcılıq Konfederasiyasına məxsus və sözügedən idman növü üzrə Avropanın ən güclü idmançıları üçün keçirilən yarışdır. Kubok il ərzində keçirilən 4 seçmə mərhələdən ibarətdir. Ruslan Lunyov iyulda Estoniyanın paytaxtı Tallində keçirilən üçüncü təsnifat mərhələsində iki gümüş və bir qızıl medal qazanıb.
Ruslan Lunyov 1989-cu ildə Bakı şəhərində anadan olub. O, 2015-ci ildə Azərbaycanı I Avropa Oyunlarında, 2016-cı ildə isə XXXI Yay Olimpiya Oyunlarında təmsil etmişdir. Lunyov Azərbaycan Respublikası Daxili İşlər Nazirliyinin Daxili Qoşunlarının kapitanı kimi xidmət edir.
