Bakıda keçirilən arena polo üzrə Avropa çempionatının açılış mərasimi baş tutub. Bu haqda bu gün, 14 sentyabr tarixində APA məlumat verib.
Açılış mərasimində Azərbaycan Atçılıq Federasiyasının (AAF) baş katibi Bəhruz Nəbiyev, Avropa Polo Federasiyasının prezidenti, Beynəlxalq Polo Federasiyasının vitse-prezidenti Pyero Dilliyer və digər rəsmi nümayəndələr iştirak ediblər.
Yarışda 4 komanda çıxış edəcək. Azərbaycanla yanaşı, Avstriya, İsveçrə və İspaniya Avropa çempionatına qatılıblar. Bütün komandalar bir-birinə qarşı oynayacaq. Toplanan xallara görə yarımfinal oyunları keçiriləcək.
Sentyabrın 18-də isə üçüncü yer və final uğrunda görüşlər keçiriləcək. Hər komandada 3 idmançı olacaq.
Bu çempionat 2020-ci ildə 8 ölkənin iştirakı ilə baş tutmalı idi: "Komanda sayı ilə bağlı qərarı biz yox, Beynəlxalq Polo Federasiyası verir. Qurum ilk olaraq sayı 6-ya, sonra isə 4-ə endirdi. Biz belə məsələlərə müdaxilə edə bilmirik. Beynəlxalq qurumun qaydalarına əsasən, yarışı təşkil etməliyik", - federasiyanın baş katibi Bəhruz Nəbiyev bildirib.
