AFFA-nın inzibati binasında keçirilən Peşəkar Futbol Liqasının (PFL) konfransında qurumun yeni prezidenti seçilib. Bu haqda bu gün, 29 iyul tarixində Report məlumat verib.
Konfransda PFL-in prezidenti Ramin Musayev, AFFA-nın baş katibi Sərxan Hacıyev və ölkənin 9 klubunun nümayəndələri iştirak ediblər.
Görüşün əvvəlində PFL prezidenti Ramin Musayevin səhhətinə görə istefaya göndərilməsi məsələsi müzakirə olunub və müvafiq qərar qəbul edilib.
Daha sonra PFL prezidenti vəzifəsinə seçkilər keçirilib. Elxan Səmədov yekdilliklə növbəti müddətə bu vəzifəyə seçilib. O, AFFA-da hakim videoköməkçisi (VAR) sisteminə rəhbərlik edib.
Elxan Zakir oğlu Səmədov 1974-cü il yanvarın 14-də Bakı şəhərində anadan olub. 2013-2015-ci illərdə Gənclər və İdman Nazirliyində, 2015-ci ildə Bakıda keçirilən I Avropa Oyunlarında Təchizat şöbəsinin rəhbəri kimi fəaliyyət göstərib. 2021-ci ildən bugünədək AFFA-da VAR şöbəsinin rəhbəri vəzifəsində çalışıb. UEFA-nın məşqçilik üzrə “B” lisenziyasının sahibidir.
