Nizami rayonunda ağır yol qəzası qeydə alınıb. Bu haqda BakuPlus.az Apa-ya istinadən bu gün, 22 oktyabr tarixində xəbər verir.
35 yaşlı Çingiz Mirzəbəyov idarə etdiyi “Toyota” markalı avtomobillə Mikayıl Əliyev küçəsindən Babək prospektinə keçmək istəyərkən 39 yaşlı Vüsal Əhmədovun idarə etdiyi “Hyundai” markalı nəqliyyat vasitəsi yüksək sürətlə ona çarpılıb.
Zərbənin gücündən “Toyota” markalı nəqliyyat vasitəsi yol kənarında təmir sexinin ərazisindəki “Chevrolet” avtomobilinin üstünə düşüb. İdarəetmədən çıxan “Hyundai” təmir sexinin ərazisinə aşıb.
Qəza nəticəsində sürücülər Ç.Mirzəbəyov, V.Əhmədov, o cümlədən “Hyundai”da olan sərnişinlər: 31 yaşlı Hüseynpaşa Cəlilov, 29 yaşlı Şəhriyar Daşdəmirov və həmyaşıdı Faiq Əliyev ağır bədən xəsarətləri alıblar.
Xəstəxanaya yerləşdirilən yaralılar arasında olan Ç.Mirzəbəyovun vəziyyəti daha ağır qiymətləndirilir.
Faktla bağlı Nizami Rayon Polis İdarəsinin əməkdaşları tərəfindən avtotexniki ekspertiza təyin edilib.
[caption id="attachment_75900" align="alignnone" width="896"]
Foto Apa.az saytı[/caption]
