Bakı Apellyasiya Məhkəməsi qətl törətməkdə təqsirləndirilən 45 yaşlı Meyxoş Cəfərovun cəzasını sərtləşdirib. Bu haqda bu gün, 15 mart tarixində Report məlumat verib.
Hakim Faiq Qasımovun sədrliyi ilə keçirilən prosesdə birinci instansiya məhkəməsinin hökmü dəyişdirilib.
Belə ki, Cəfərovun 13 il müddətinə azadlıqdan məhrumetmə cəzası 14 il 3 ay müddətinə azadlıqdan məhrumetmə cəzası ilə əvəz edilib.
Ötən ilin iyul ayının 24-də Xəzər rayonunda öz həyat yoldaşını şəxsi münasibətlər zəminində aralarında yaranan mübahisə zamanı bıçaqlayaraq öldürməkdə şübhəli bilinən Meyxoş Cəfərov istintaqa cəlb edilmişdir.
Cütlüyün 3 övladı var. Bildirilir ki, ana və uşaqlar Cəfərov tərəfindən tez-tez döyülürdülər.
