Paytaxtın Sabunçu rayonu ərazisində yerləşən restoranlardan birinin sahibindən pul tələb edən və avtomobilini yandıran dəstə üzvləri saxlanılıblar. Bu haqda bu gün, 21 iyun tarixində Bakuplus.az Daxili İşlər Nazirliyinin (DİN) Mətbuat Xidmətinə istinadən məlumat verir.
Sabunçu RPİ 13-cü polis bölməsinin əməkdaşlarının keçirdikləri əməliyyat-axtarış tədbirləri nəticəsində hadisəni törətmiş Ceyhun Abdullayev, Nurlan Məmmədov və Ruslan Abdullayev tutulublar.
İstintaq zamanı müəyyən edilib ki, Nurlan Məmmədov Ceyhun Abdullayevin tapşırığı ilə xarici dövlətdə qeydiyyatda olan mobil telefon nömrəsindən zərərçəkmiş şəxsə zəng edərək özünü “Maqa” kimi təqdim edib, ondan 100 min manat pul tələb edib. Zərərçəkmiş bu tələbi yerinə yetirmədiyindən dəstənin digər üzvü Ruslan Abdullayevlə əlbir olub, iş adamının yaşadığı Bakıxanov qəsəbəsindəki evinin qarşısında “Lexus” markalı avtomobilini yandırıblar.
Saxlanılan şəxslərlə bağlı toplanmış materiallar Sabunçu RPİ-yə göndərilib, istintaq hərəkətləri həyata keçirilir.
