Bakı şəhəri və Abşeron yarımadasında bu gün, 16 noyabr, gecə saatlarından başlayaraq küləkli və yağışlı hava müşahidə olunur. Şəhərin bəzi rayonlarında, o cümlədən, Nizami, Sabunçu, Xətai rayonlarında səhər saatlarında dolu yağıb.
Qeyri-sabit hava şəraiti nəticəsində Nərimanov rayonunda, Əliyar Əliyev küçəsində ağac aşaraq iki avtomobil üzərinə düşüb. Hər iki avtomobilə ciddi madi ziyan dəyib.
Daha bir ağac Xətai rayonu, Qaçaq Nəbi küçəsində “Əhmədli” stansiyasının yaxınlığında binanın həyətində olan ağac qırılaraq söhbətqahın üzərinə aşıb. Hadisə yerinə rayon İcra hakimiyyətinin əməkdaşları cəlb olunub. Xəsarət alan olmayıb. Məhəllədə duran minik avtomobilinə maddi ziyan dəyib.
Səbail rayonu jurnalistlər üçün inşa edilən yaşayış kompleksində isə 3-cü binanın damını külək uçurub.
Fövqəladə Hallar Nazirliyi hava şəraiti ilə əlaqədar olaraq əhalidən diqqətli olmalarını, müvafiq təhlükəsizlik qaydalarına ciddi əməl etmələrini və güclü küləyin yaratdığı təhlükələrdən qorunmaq üçün qəti zərurət olmadıqca küçəyə çıxmamalarını məsləhət görür.
