Report.az xəbər verir ki, "Ərazidə yanğın tam söndürülüb, Lakin Yüksək temperatur müşhaidə olduğundan hazırda ərazidə soyudulma işləri aparılır."
Bundan əlavə, paytaxtın Xətai rayonunda baş verən yanğınla əlaqədar ərazidən keçən avtomobil yolunda nəqliyyatın hərəkətinə qoyulan məhdudiyyət aradan qaldırılıb.
Bu barədə BakuPlus.az-a Nəqliyyatın İnntellektual İdarəetmə Mərkəzindən (NİİM) məlumat verilib.
Məlumatda qeyd edilib ki, rayonun Süleyman Əhmədov küçəsində baş verən yanğın səbəbindən 8 Noyabr prospektindən qeyd olunan küçə istiqamətində nəqliyyat vasitələrinin hərəkətinə qoyulan məhdudiyyət aradan qaldırılıb.
15:05 - Xətai rayonunda qeydə alınan yanğın məhdudlaşdırılıb
Xətai rayonunda qeydə alınan yanğın məhdudlaşdırılıb.
Fövqəladə Hallar Nazirliyindən BakuPlus.az-a verilən məlumata görə, briqadalar tərəfindən həyata keçirilmiş zəruri və təxirəsalınmaz tədbirlər sayəsində Bakı şəhəri, Xətai rayonu, Süleyman Əhmədov küçəsində yerləşən boya istehsalı sexində baş vermiş yanğın ətraf ərazilərə yayılmasına imkan verilmədən məhdudlaşdırılıb.
Hazırda yanğının tam söndürülməsi istiqamətində tədbirlər davam etdirilir.
Bundan əlavə Ekologiya və Təbii Sərvətlər Nazirliyinin mütəxəssisləri yanğın baş vermiş ərazidə monitorinq aparır.
Bu barədə Dövlət Ekoloji Təhlükəsizlik Xidmətinin rəsmisi Qafar Ağayev məlumat verib.
O qeyd edib ki, nazirlik əməkdaşları hazırda ərazidə monitorinq işləri aparır:
"Havaya yayılan qara tüstü axını ilə bağlı havanın çirklənmə səviyyəsini müəyyən etmək məqsədilə mütəxəssislər tərəfindən atmosfer havasından xüsusi cihazlarla nümunələr götürülür".
Əlavə məlumat veriləcək.
14:42 - Yanğın "Best boya"nın obyektində baş verib - VİDEO
Bakuplus.az-a daxil olan məlumata görə, Xətai rayonu, S.Əhmədov küçəsi yaxınlığındaki baş verən yanğın "Best boya" boya-kimya sənayəsi obyektində baş verib.
Hazırda yanğınsöndürmə işləri həyata keçirilir.
14:26
Xətai rayonunda baş verən yanğınla bağlı hadisə yerinə 6 təcili yardım briqadası göndərilib.
TƏBİB-dən BakuPlus-un sorğusuna cavab olaraq bildirilib ki, 27.09.2024-cü il tarixində saat 13:30 radələrində Respublika Təcili və Təxirəsalınmaz Tibbi Yardım Mərkəzinə Bakı şəhəri, Xətai rayonu, NZS qəsəbəsi, S.Əhmədov küçəsində yanğın baş verməsi səbəbilə çağırış daxil olub.
Belə ki, hadisə yerinə 6 təcili tibbi yardım briqadası cəlb edilib.
İndiyədək hadisə ilə əlaqədar olaraq təcili tibbi yardım xidmətinə müraciət qeydə alınmayıb.
Əlavə məlumat veriləcək.
14:15
Xətai rayonu, Süleyman Əhmədov küçəsində yanğın hadisəsi baş verib.
OLAY-ın əldə etdiyi məlumata görə, Xəzər Media Mərkəzinin binasının qonşuluğunda olan yanğına görə, kanalda evakuasiya prosesi başlayıb.
Həmçinin, bu səbəbdən 8 Noyabr prospektindən qeyd olunan küçə istiqamətində nəqliyyat vasitələrinin hərəkətinə məhdudiyyət tətbiq edilib.
14:05 - Bakıda obyektdə yanğın başlayıb, 8 Noyabr prospektində məhdudiyyət tətbiq edilib
Fövqəladə Hallar Nazirliyinin (FHN) "112" qaynar telefon xəttinə Bakı şəhəri, Xətai rayonu, S.Əhmədov küçəsi yaxınlığında obyektdə yanğın olması barədə ilkin məlumat daxil olub.
BakuPlus.az FHN-ə istinadən xəbər verir ki, məlumatla əlaqədar Nazirliyin müvafiq xilasetmə qüvvələri çağırış üzrə cəlb olunublar.
Hazırda yanğınsöndürmə işləri həyata keçirilir.
