Bakının Xətai rayonu, Əhmədli qəsəbəsi, M.Hadi küçəsində yerləşən çoxmərtəbəli yaşayış binasında yanğın başlayıb. Bu haqda bu gün, 17 iyun, saat 10:00-da Fövqəladə Hallar Nazirliyinin (FHN) mətbuat xidməti məlumat verib.
Hadisə yerinə FHN-in yanğınsöndürmə və xilasetmə briqadaları cəlb olunub. Hazırda yanğınsöndürmə işləri davam etdirilir.
Xəbər yenilənəcək.
11:15 - Yenilənib
Yaşayış binasının 8-ci mərtəbəsində yerləşən mənzildə baş verən yanğın FHN əməkdaşları tərəfindən söndürülüb. Alovun digər mənzillərə keçməsinin qarşısını alınıb.
Binanın sakinləri təhlükəsiz əraziyə təxliyə edilib, xəsarət alan olmayıb.
11:50 - Yenilənib
Fövqəladə Hallar Nazirliyinin Dövlət Yanğından Mühafizə Xidmətinin qərargah rəisi Xudat Nəbiyevin sözlərinə görə, yanğının baş verməsinin ilkin səbəbi elektrik naqillərində baş verən nasazlıq olub.
