Bakının Qaradağ, Yasamal və Suraxanı rayonlarında 11 narkotacir saxlanılıb. Bu haqda 12 noyabr tarixində Report xəbər verib.
Qaradağ rayonunda polisin keçirdiyi tədbir zamanı narkotik vasitələrinin satışı ilə məşğul olan Nicat Əhmədov saxlanılıb. Onun üzərindən və evindən 16 kiloqram heroin, 2 kiloqram tiryək, 20 kiloqram metamfetamin, 2 ədəd elektron tərəzi, 400 ədəd metadon həbi aşkar edilib.
Yasamal və Suraxanı rayonlarında polisin həyata keçirdiyi növbəti əməliyyatlar zamanı beynəlxalq narkoşəbəkənin üzvləri Əbil Məmmədov, Müşfiq İsmayılov və Vüqar Quliyev saxlanılıblar. Onların yaşadıqları evlərdən və üzərilərindən 6 kiloqram 800 qram heroin, 2 kiloqram 620 qram metamfetamin, 1 kiloqram 425 qram tiryək, 7 kiloqram marixuana və 1 ədəd elektron tərəzi aşkar olunub. Araşdırma zamanı müəyyən olunub ki, onlar xaricdəki narkotacirlər üçün ölkə ərazisində narkokuryerlik edirlərmiş.
Paytaxtın digər rayonlarında narkotik vasitələrın satışını həyata keçirən Ötkəm Piriyev, Rəfael Xəlilov, Elşən Babayev, Ayaz Həsənov, Şahbaz Babayev, Sadiq Məmmədov və Nicat Abdullayev saxlanılıblar. Onlardan 3 kiloqram 300 qram heroin, 3 kiloqram 600 qram tiryək, 300 ədəd metadon həbləri və 2 ədəd elektron tərəzi dövriyədən çıxarılıb.
Faktlarla bağlı cinayət işi başlanılıb.
