Bakının Səbail rayonunda saxlanma zamanı polisə müqavimət göstərən şəxs məhv edilib. Bu haqda bu gün, 14 fevral tarixində Bakuplus.az Daxili İşlər Nazirliyinin mətbuat xidmətinə istinadən məlumat verir.
Fevralın 12-də çağırışa gələn polis serjantları 32 yaşlı Eldəniz Məmmədov və 30 yaşlı Coşqun Məmmədli xidməti vəzifələrini yerinə yetirərkən bıçaqlanıb. 102 Zəng Mərkəzinə daxil olan məlumata əsasən, 28 yaşlı Aydın Babayev qeyri-rəsmi münasibətdə olduğu gənc qadını bıçaqlayıb. Onu polis bölməsinə dəvət etmək cəhdi zamanı Babayev polislərə bıçaqla xəsarət yetirərək hadisə yerindən yayınıb.
Keçirilən əməliyyat-axtarış tədbirləri nəticəsində Babayevin gizləndiyi yer müəyyən edilib. Lakin Aydın Babayev ələ keçirilməmək üçün müqavimət göstərib və əl qumbarası ilə özünü və polisləri partlatmağa cəhd edib. Onun bu cəhdinin qarşısı alınıb və nəticədə Babayev zərərsizləşdirilib.
Hadisə yerinə Prokurorluq əməkdaşları tərəfindən baxış keçirilərkən, Babayevə məxsus evdə 1 ədəd “LLama cal 32” markalı tapança və 1 ədəd “F-1” əl qumbarası, evin içərisində və həyətində ümumilikdə 4 giliz, Babayevin əynində olan şalvarın cibində isə bükümdə narkotikə bənzər bir maddə aşkar edilib.
İstintaq zamanı həmçinin müəyyən edilib ki, Aydın Babayev, barəsində Səbail rayon Polis İdarəsi tərəfindən Cinayət Məcəlləsinin 221.1-ci maddəsi ilə cinayət işi başlanaraq axtarışa verilmişdir.
Faktla bağlı Cinayət Məcəlləsinin müxtəlif maddələri ilə başlanmış cinayət işinin istintaqı Baş Prokurorluğun İstintaq İdarəsinə həvalə edilib.
Araşdırma aparılır.
