Sosial şəbəkələrdə Bakı şəhəri, Xətai rayonu, Gəncə prospekti, 39 ünvanında yerləşən “Xətai Park” yaşayış kompleksinin 10-cu mərtəbəsində atışmanın baş verməsi ilə bağlı məlumat yayılıb. Nəticədə evin kirayəçilərindən birinin pəncərəsi zədələnib. Məsələ ilə bağlı Daxili İşlər Nazirliyinin mətbuat xidməti 23 may tarixində açıqlama verib.
Hadisənin ehtiyatsızlıq ucbatından baş verdiyi qeyd edilir. Polis əməkdaşları tərəfindən araşdırma aparılıb. Tir tüfəngi olan şəxs pəncərəsinə qonan qarğanı vurmaq istəyib. Nəticədə güllə qonşunun pəncərəsinə dəyərək onu zədələyib. Qeyd olunur ki, bu hal daha əvvəl də yaşanıb.
“Tir tüfəngi, yaxud idman silahı olan şəxslər bilməlidir ki, bu kateqoriyadan olan xüsusi vasitələrin yaşayış olan ərazilərdə istifadəsi qadağandır. Həmin şəxslər onu da bilsinlər ki, bu neqativ hal xəsarətlə nəticələnməklə yanaşı, kiməsə stres, narahatlıq, həyəcan yaşada bilər”, - deyə nazirliyinin rəsmisi bildirib.
