Bakının Nizami rayonunda yaşayış binalarının birindən 2 yaşlı uşaq 7-ci mərtəbədən 6-cı mərtəbəyə yıxılıb. Onun hamilə anası özünü onun ardınca atıb. Onlar Kliniki Tibbi Mərkəzə (Semaşko xəstəxanası) yerləşdiriliblər. Bu haqda bu gün, 20 iyun tarixində tibb müəssisəsinin rəsmisi Elnur Hidayətoğlu məlumat verib.
Hər iki şəxsə ilkin tibbi yardım göstərilib, həyatları üçün hər hansı bir təhlükə yoxdur.
2 yaşlı Tamerlan Umalatovda ümumi səthi zədələr və sıyrıqlar var. Körpə dərhal ultrasəs müayinəsindən keçirilib, daxili zadələr aşkar edilməyib. Uşağın vəziyyəti stabildir.
27 yaşlı Rövşanə Umalatovanın üzərində əzik və yüngül xəsarətlər olub. Hamiləliyin 20-ci həftəsində olan qadına ilkin tibbi yardım göstərilib. O, ultrasəs müayinəsindən keçirilib və Mərkəzin Doğum-Ginekologiya şöbəsinə yerləşdirilib. Qadının vəziyyəti kafi kimi qiymətləndirilir.
