Bakıda zavodda baş vermiş partlayışda bir nəfər ölüb. Bu haqda BakuPlus.az Qaradağ rayon prokurorluğuna istinadən bu gün, 7 may tarixində xəbər verir.
Mayın 6-sı saat 03:00 radələrində Qaradağ rayonu, Salyan şosesində yerləşən sement zavodunda partlayış baş verib.
Hadisə nəticəsində həmin zavodda təkərçi-çilingər vəzifəsində işləyən 32 yaşlı Abdullayev Sakit ölüb.
Araşdırmalar nəticəsində müəyyən edilib ki, Sakit Abdullayev yük avtomobilinin təkərinə normadan artıq hava təzyiqi vurduğundan partlayış baş verib. Partlayışın təsirindən təkər diskdən ayrılaraq Sakit Abdullayevin baş nahiyəsinə dəyib və o hadisə yerində ölüb.
Faktla bağlı Qaradağ rayon prokurorluğunda cinayət işi başlanıb.
Hazırda iş üzrə istintaq davam edir.
