Bakıda özünü qazi kimi qələmə verən şəxslər intihara cəhd ediblər. Bu haqda bu gün, 23 sentyabr tarixində Bakuplus.az Daxili İşlər Nazirliyinə istinadən xəbər verir.
Belə ki, özünü qazi kimi təqdim edən bir qrup şəxs Bakı Dövlət Universitetinin tələbə yataqxanasına daxil olaraq bir neçə otağı zəbt edib. Hadisə yerinə gələn polis əməkdaşları müdaxilə etməyə çalışan zaman onlar polis əməkdaşlarına xəsarət yetirmək istəyiblər, daha sonra 2 nəfər intihara cəhd görüntüsü yaradıb.
Araşdırma zamanı məlum olub ki, həmin şəxslərdən biri borclu qismində axtarışda olan 30 yaşlı Rufan Mahmudovdur. O, özünü “Varis" şəhid ailələri və qazilərə qayğı ictimai birliyinin üzvü və müharibə iştirakçısı kimi təqdim etməklə tabesizlik göstərib, qanunsuz tələblər irəli sürüb.
Onunla birlikdə 30 yaşlı Ruslan Süleymanov olub. O, əvvəllər də Yasamal rayonu A.Abbasov küçəsində yerləşən Həkimlərin Təkmilləşdirmə İnstitutunun otaqlarını zəbt etmişdi. R.Süleymanovun 3-cü dərəcəli əlillik statusu var və özünü qazi kimi təqdim edir.
Həmin şəxslər polis orqanına dəvət ediliblər. Onların sağlamlıq vəziyyəti nəzərə alınaraq, barələrində müvafiq tədbirlər görülür.
