Bakı metrosunun “Əhmədli” stansiyasında polislə sərnişinlər arasında insident baş verib. Müvafiq video sosial şəbəkələrdə yayılıb. Bu haqda bu gün, 6 iyul tarixində Bakuplus.az məlumat verir.
Sərnişinlər tərəfindən lentə alınan görüntülərdə bir neçə nəfərin polis əməkdaşları tərəfindən saxlanıldığı görünür.
Daxili İşlər Nazirliyindən (DİN) bildirilib ki, hadisə iyulun 5-də baş verib. Polis əməkdaşları təhlükəsizlik qaydalarına uyğun olaraq, iki qadından çantaları introskopa (hərəkətli lenti olan xüsusi rentgen aparatı - red.) yerləşdirməyi tələb ediblər. Sərnişinlər isə öz növbəsində polisin qanuni tələbini yerinə yetirməkdən imtina edərək qışqırmağa başlayıblar.
“Daha sonra hadisə yerinə qadınların qohumları yaxınlaşaraq, polisə müqavimət göstərməyə çalışıblar. İctimai qaydanı pozan və polisin qanuni tələbinə tabe olmayan şəxslər saxlanılıblar. Onlar barəsində inzibati protokol tərtib edilərək, baxılması üçün məhkəməyə göndərilib”, - deyə nazirlikdən bildirilib.
[video width="1920" height="1080" mp4="https://bakuplus.az/storage/photos/2023/07/metroda-dava1.mp4"][/video]
