Bakıda gecə ərzində 2 yanğın hadisəsi qeydə alınıb. Yanğınlar paytaxtın Xəzər rayonunda baş verib. Bu haqda Fövqəladə Hallar Nazirliyinin mətbuat xidməti 17 noyabr tarixində məlumat yayıb.
Rayon ərazisində ümumi sahəsi 1800 kv.m olan quşçuluq fermasının içərisinə səpilən taxta yonqarı 200 kv.m sahədə yanıb, yüksək temperatur səbəbindən 15 ədəd plastikdən ibarət yem qabı əriyib.
Baş vermiş digər yanğın nəticəsində həyətyanı ərazidə ümumi sahəsi 12 kv.m olan köməkçi tikilinin yanar konstruksiyaları və içərisində 1 ədəd kombi aparatı yanıb.
Hər iki yanğın FHN əməkdaşları tərəfindən söndürülüb, ətrafdakı tikililər yanğından mühafizə olunub.
