Bakıda kişi 23 həftəlik hamilə arvadını hansı səbəbdən bıçaqlaması məlum olub. Bu haqda 7 iyul tarixində Lent.az məlumat verib.
Nizami rayonunda ötən ilin aprelində Pərvin Ağayev ilə arvadı Şəbnəm İsmayılova arasında dava düşüb. Dava zamanı Şəbnəm İsmayılova boğaz və döş qəfəsi nahiyələrindən 3 bıçaq xəsarəti alıb.
Qadın xəstəxanaya yerləşdirilib və onun 23 həftəlik hamilə olduğu məlum olub. Pərvin Ağayev saxlanılıb və onun barəsində cinayət işi açılıb.
Məlum olub ki, son vaxtlarda qısqanclıq zəminində Pərvinlə Şəbnəm arasında tez-tez davalar olub. Arvadı Pərvini başqa qızlarla gəzməkdə ittiham edirmiş.
Hadisə günü Şəbnəm Pərvinə zəng edərək onunla dava edib.
“Pozğun qadınlara vaxt ayıra bilirsən, lakin mənə vaxt ayırmırsan, kişi ol, ə” sözlərini deyib. Dalınca qışqıra-qışqıra nalayiq ifadələr işlədib. Mən də ona cavabımda söyüşlər söydüm və “axşam evə gələndə danışacağıq” dedim. Evə gələndə Şəbnəm mənzilin qonaq otağından mənə qarşı nalayiq ifadələr işlədirdi və boşanmaq istədiyini bildirirdi. Şəbnəmin sözlərindən əsəbiləşib qonaq otağına keçərək onun yaxasından tutub sakitləşməsini və söyüş söyməməsini tələb etdim. Əks təqdirdə öldürəcəyimi bildirdim. Şəbnəm isə mənə “öldürməyən kişi deyil” deyəndə, otaqda, stolun üzərində olan mətbəx bıçağını götürdüm. Şəbnəmə təkrarən əgər səsini kəsməsə, söyüş söyməyə davam etsə, bıçaqla vuracağımla bağlı xəbərdarlıq elədim. Şəbnəm yenə də “vurmayan kişi deyil” deyəndə bıçaqla onun boyun nahiyəsindən vurdum”, - Ağayev ifadə verib.
Məhkəmədə Şəbnəm İsmayılova ifadə verib və bildirib ki, hadisədən sonra onların uşaqları dünyaya gəlib:
“Pərvini uşağımın atası kimi bağışlamışam, onunla barışmışam. Bu səbəbdən şikayətimdən imtina edirəm. Xahiş edirəm ki, bunu nəzərə alın”.
Bakı Ağır Cinayətlər Məhkəməsinin hökmü ilə Pərvin Ağayev CM-nin “Qəsdən adam öldürmə cəhd, xüsusi amansızlıqla və ya ümumi təhlükəli üsulla adam öldürməyə cəhd” maddəsi ilə ittiham olunub və 11 il 3 ay müddətinə azadlıqdan məhrum edilib.
