Bakıda bu gün, 6 iyun gecə saatlarında Səbail Rayon Polis İdarəsinin Bayılda yerləşən 8-ci Polis Bölməsinin qarşısında gənc qadın özünü yandırıb. Bu haqda Qafqazinfo məlumat verib.
32 yaşlı Ə.Əliyeva (şərti) gecə saat 00:10 radələrində bölmənin qarşısına gələrək üzərinə benzin töküb və alışqanla yandırıb. Polis əməkdaşları müdaxilə edərək alovu söndürüblər. Əliyeva təcili tibbi yardım maşını ilə Respublika Yanıq Mərkəzinə çatdırılıb. Yaralının vəziyyətinin ağır olduğu bildirilir.
İlkin məlumata görə, hadisədən əvvəl Ə.Əliyevanın qeyri-rəsmi nikahda yaşadığı 28 yaşlı Ə.Quliyev (şərti) polis əməkdaşları tərəfindən saxlanılıb. Belə ki, Bayıl qəsəbəsində Ə.Quliyevin sevgilisi ilə münaqişə yaradaraq ictimai yerdə asayişi pozduğunu görən polis əməkdaşları onu saxlayaraq 8-ci Polis Bölməsinə gətiriblər.
Ə.Quliyev barəsində “Polisin qanuni tələbinə qəsdən tabe olmama” maddəsi ilə protokol tərtib edilib və məhkəməyə göndərilib.
Bundan sonra sevgilisi bölmənin qarşısına gələrək özünü yandırıb. Faktla bağlı araşdırmalar davam etdirilir.
