Bakının Səbail rayonunda tarixi memarlıq abidəsi kimi qeydiyyatda olan doğum evinə qanunsuz müdaxilə edilib. Bu haqda bu gün, 23 oktyabr tarixində Bakuplus.az Oxu.az-a istinadən məlumat verir.
Kliniki Tibbi Mərkəz publik hüquqi şəxsin tabeliyində olan Şamama Ələsgərova adına 5 saylı Kliniki Doğum Evinin dam örtüyü və döşəmələrinə qanunsuz müdaxilə olunub.
Dövlət Şəhərsalma və Arxitektura Komitəsindən bildirilib ki, Bayıl qəsəbəsi, Neftçi Qurban küçəsi, 93 ünvanında yerləşən 1930-cu ilə aid 3311 inventar nömrəli yerli əhəmiyyətli memarlıq abidəsinə baxış keçirilib. Binaya baxış zamanı müvafiq xəbərdarlıq edilib, binanın dam örtüyünün və döşəmələrinin yenidən qurulması işləri dayandırılıb.
Həmin bina İkinci Dünya Müharibəsinə qədər şəhər mətbəxi kimi istifadə olunub. Müharibə illərində bina evakuasiya xəstəxanası kimi istifadə edilib. 1946-cı ildən Azərbaycan SSR Səhiyyə Nazirliyinin tabeliyində olub və Nadejda Krupskaya adına 5 saylı Doğum Evi adlanıb.
Müstəqillik illərində Nadejda Krupskaya adına 5 saylı Doğum Evinin adı dəyişdirilərək Ş.Ələsgərova adına 5 saylı Doğum Evi adlandırılıb.
