Sabunçu rayonu, Pirşağı-Zabrat mənzilinin 25-ci kilometrində dəmir yollarında təhlükəsizliyi təmin etmək üçün quraşdırılan dəyəri 3000 manat olan 22 ədəd metal toru oğurlayan şəxs saxlanılıb. Bu haqda bu gün, 26 iyun tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
Polisə daxil olan məlumata görə, dəmir yolu kənarına çəkilmiş 22 ədəd əlvan metaldan olan tor oğurlanıb. Dəmir Yolu Nəqliyyatında Polis İdarəsinin Sabunçu Xətt Polis Şöbəsinin əməkdaşları tərəfindən əməliyyat-axtarış tədbirləri nəticəsində hadisəni törətməkdə şübhəli bilinən Bakı şəhər sakini Kamran Loğmanov qısa zamanda saxlanılıb və Polis Şöbəsinə gətirilib.
Həmin şəxsin oğurladığı dəmir torlar polis əməkdaşları tərəfindən aşkar olunaraq maddi sübut kimi götürülüb. Kamran Loğmanov ifadəsində dəmir torları satmaq məqsədilə oğurladığını etiraf edib.
O, etdiyi oğurluq nəticəsində dəmir yolu təsərrüfatına 3 min manata yaxın maddi ziyan vurub. Faktla bağlı Dəmir Yolu Nəqliyyatında Polis İdarəsinin Sabunçu Xətt Polis Şöbəsində araşdırmalar davam etdirilir.
