Paytaxtın Sabunçu rayonundakı Maştağa qəsəbəsində yerləşən psixiatriya xəstəxanasında müalicə alan şəxsin xəsarət alması ilə bağlı araşdırma aparılır. Bu haqda bu gün, 16 avqust tarixində Bakuplus.az APA-ya istinadən xəbər verir.
Daxili İşlər Nazirliyinin Mətbuat Xidmətindən verilən məlumata görə, xəsarətləri digər ruhi-əsəb xəstəsi yetirib. Xəsarətlərin dərəcəsini müəyyən etmək üçün ekspertiza təyin olunub.
Faktla bağlı qanunvericiliyə uyğun tədbir görüləcək. Sosial şəbəkələrdə Elkin Kərimli adlı istifadəçi atasının Maştağa Psixiatriya xəstəxanasında döyüldüyünü iddia edib. O, gecə növbəsində hadisəni heç kimin görmədiyini və polis mühafizəsinin yetərsiz olduğunu bildirib. Elkin Kərimli atasının təcili yardımla xəstəxanaya aparıldığını, lakin vəziyyətinin ağır olduğunu və müalicə edilmədiyini qeyd edib.
