Bakıda narkotikləri satmaq məqsədilə evindəki soyuducuda gizlədən şəxs polisin keçirdiyi əməliyyat nəticəsində saxlanılıb. Bu haqda bu gün, 18 dekabr tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
Narkotik vasitələrin qanunsuz dövriyyəsinə qarşı növbəti əməliyyatı zamanı əvvəllər məhkum olunmuş Saatlı rayon sakini Emin Muradov saxlanılıb. Onda metamfetamin aşkar olunub. Dindirilmə zamanı o, metamfetamini tanışı, Xətai rayonunda yaşayan Qabil adlı şəxsdən aldığını bildirib.
Əməliyyatın davamı olaraq Yevlax rayon sakini Qabil Abdullayev də saxlanılıb. Baxış zamanı onun yaşadığı evdə soyuducuda gizlətdiyi 2 kiloqrama yaxın metamfetamin və marixuana aşkar olunaraq götürülüb.
Araşdırma zamanı onun İran vətəndaşı ilə sosial şəbəkələr vasitəsilə əlaqə yaradaraq ölkə ərazisinə müxtəlif qanunsuz yollarla göndərilən narkotikləri satmaq məqsədilə qəbul etdiyi məlum olub. Faktla bağlı istintaq davam etdirilir.
