Bakının Heydər Əliyev prospektində narkotik vasitənin təsiri altında avtoxuliqanlıq edən sürücü həbs edilib. Bu haqda bu gün, 25 yanvar tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
Nəqliyyat vasitəsində konstruksiya dəyişikliyi etdiyi üçün “Kia” markalı, 99-RO-503 dövlət qeydiyyat nişanlı nəqliyyat vasitəsinin sürücüsünə “saxla” işarəsi verilsə də, o, nəqliyyat axınınına əks-istiqamətdə hərəkətini davam edib.
Görülən tədbirlər nəticəsində digər hərəkət iştirakçılarının da həyatı üçün təhlükə yaradan sürücü Elşən Qanbayev saxlanılıb. Sənədləri yoxlanılan zaman hərəkətləri şübhə doğurduğundan onun tibbi müayinədən keçməsi təmin olunub. Müayinə zamanı Qanbayevin narkotik təsiri altında olması müəyyən olunub.
Bununla bağlı protokol tərtib olunub, iş məhkəməyə göndərilib. Məhkəmənin qərarı ilə Qanbayevin sürücülük hüququ 1 il müddətinə məhdudlaşdırılıb və o, 15 sutka inzibati qaydada həbs edilib.
[video width="848" height="480" mp4="https://bakuplus.az/storage/photos/2024/01/video-whatsapp-2024-01-25-v-09.09.04_e1c8b2501.mp4"][/video]
