Xətai rayonunda fəhlə fırıldaqçının qurbanı olub. Bu haqda 18 mart tarixində Bakutv məlumat verib.
8 noyabr prospekti ərazisində bir nəfər naməlum şəxs Bakıya işləmək üçün gələn Fərid İrşadovun 650 manatını mənimsəyib. Qarət edilən şəxsin iddiasına görə pulunu oğurlayan fırıldaqçı özünü jurnalist kimi qələmə verib.
Fərid İrşadov bildirib ki, küçədə ona bir nəfər yaxınlaşıb və özünü jurnalist kimi təqdim edib. Daha sonra bildirib ki, sosial eksperiment aparır və nəzarət kamerasına işarə edərək deyib ki, bu çəkiliş kamerasıdır. “Jurnalist” onunla bir oyun oynamağı təklif edib və onun pul kisəsini istəyib. Fırıldaqçı kisənin içindən 650 manat götürüb və Fəriddən kameraya daha yaxşı düşmək üçün ondan uzaqlaşmağı istəyib.
“Dedim pulumu ver, mənim zəhmətimdir. Dedi narahat olma pulunu sənə çatdıracam. Bir az qabağa get, çəkilişdir. Mən də getdim. Arxaya baxdım, görürəm gəlir. Dedi get, qardaş, get. İşarə etdi ki, kameraya hamısı düşüb. Sonra arxaya döndüm gördüm yoxdu. 650 manat həm mənim aylıq əmək haqqımdır, həm də digər şəxsin əmanət puludur”, - Fərid İrşadov bildirib.
Hazırda zərərçəkən həm bir qəpiksiz qalıb, həm də borclu.
Hadisə barədə artıq hüquq mühafizə orqanlarına məlumat verilib və araşdırma aparılır.
