Bakıda arvadını qətlə yetirən şəxsin məhkəməsində zərərçəkmişlər dindirilib. Bu haqda 10 mart tarixində Report məlumat verib.
Xəzər rayonu, Zirə qəsəbəsi ərazisində 2021-ci il avqustun 3-də 43 yaşlı Füzuli Qarayev və arvadı 23 yaşlı Sevinc Məhərrəmova arasında mübahisə baş verib. Mübahisədən sonra Məhərrəmova küsüb və qonşusu Röyal Hüseynovun evinə gedib. Bu hərəkətə görə qəzəblənən Qarayev onu bıçaqlayaraq öldürüb.
Bundan əlavə o, Röyal Hüseynovu və onun yanında fəhlə işləyən Ramil Bəşirovu da bıçaqlayıb.
10 mart tarixində Bakı Ağır Cinayətlər Məhkəməsində Füzuli Qarayevin cinayət işi üzrə məhkəmə prosesində mərhumun atası Yalçın Məhərrəmov dindirlib. O bildirib ki, hadisədən əvvəl də onun qızı dəfələrlə təcavüzə məruz qalıb.
Daha sonra mərhumun anası Mətanət Məhərrəmova dindirilib. Onun sözlərinə görə, Qarayev hadisədən əvvəl dəfələrlə qızını ölümlə hədələyib.
"Ailədə həmişə dava-dalaş olardı. O, qızımı təhdid edirdi ki, evə gəlməsən uşaqları öldürəcəm. Çünki uşaqlar Füzuli ilə birgə qalırdı. Məişət zəminində olan problemlərə görə qızımı döyürdü”, - Mətanət Məhərrəmova ifadə verib. F.Qarayev isə ona qarşı səsləndirilən ittihamlarla razılaşmadığını bildirib.
Həmçinin məlum olub ki, Sevinc Məhərrəmova ölümdən əvvəl qadın sığınacağına müraciət edib.
Məhkəmənin növbəti iclası martın 29-na təyin edilib.
