Bu gün Bakının Qaradağ rayonu, Lökbatan qəsəbəsində açıq ərazidə yanğın baş verib. Bu haqda məlumatı 23 iyun tarixində Fövqəladə Hallar Nazirliyinin (FHN) mətbuat xidməti verib.
Hadisə yerinə FHN Dövlət Yanğından Mühafizə Xidmətinin əməkdaşları cəlb olunublar. Əraziyə gələn mütəxəssislərin sözlərinə görə, güclü külək səbəbindən hər an alovun yaxınlıqdakı kommunikasiya xətlərinə keçmək təhlükəsi yaranıb.
Güclü küləyin yaratdığı maneəyə baxmayaraq, yanğın qısa müddətdə söndürülüb, yaxınlıqdakı kommunikasiya xətlərinə, o cümlədən yüksək gərginlikli hava elektrik xətlərinə və neft sənayesi obyektlərinə ziyan vurulmasının qarşısı alınıb. Yanğın nəticəsində 5 hektara yaxın ərazidə qamışlıq yanıb.
