Sosial şəbəkələrdə Lökbatan qəsəbəsi, 28 May küçəsində söyüd ağacının kəsilməsi ilə bağlı görüntülər yayılıb. Bu haqda bu gün, 4 oktyabr tarixində Bakuplus.az Baku TV-yə istinadən məlumat verir.
Əraziyə cəlb olunmuş çəkiliş qrupu ağacın gövdəsindən yarımçıq kəsildiyini qeyd ediblər. Ağacı kəsənlər bəzi səbəblərə görə işlərini axıra çatdıra bilməyiblər. Ağacın bir hissəsi çürüyüb və ətrafdakı sakinlər bildirirlər ki, külək əsəndə ağac möhkəm silkələnir və bu həm yaxınlıqda yerləşən avtomobillər üçün, eyni zamanda ərazidən keçən piyadalar üçün ciddi təhlükə yaradır.
Bakı şəhər Yaşıllaşdırma Təsərrüfatı Birliyindən məsələ ilə bağlı bildirildi ki, ağacların götürülməsi yalnız Ekologiya Nazirliyinin müvafiq rəyi olduqda mümkündür. Sözügedən ağac barədə isə rəy mövcud deyil.
