Daxili İşlər Nazirliyinin (DİN) Baş Narkotiklərlə Mübarizə İdarəsinin əməkdaşları tərəfindən həyata keçirilən növbəti xüsusi əməliyyat tədbiri nəticəsində xüsusilə külli miqdarda narkotik vasitələrin qanunsuz dövriyyəsinin qarşısı alınıb. Bu haqda bu gün, 30 sentyabr tarixində Bakuplus.az DİN-ə istinadən məlumat verir.
İrandan Azərbaycana narkotik vasitələr gətirən əvvəllər məhkum olunmuşlar – 36 yaşlı Tural Həsənov, 30 yaşlı Pünhan Mehdizadə və 28 yaşlı Mahir Aslanlı saxlanılıblar. Baxış keçirilən zaman onların idarə etdikləri avtomobil və yaşayış ünvanlarından 41 kiloqram heroin, 19 kiloqram “patı”, “şüşə” kimi adlandırılan metamfetamin, 2000 ədəd "metadon" həbi olmaqla ümumilikdə 60 kiloqram narkotik vasitə, elektron tərəzilər və narkotiklərin qanusuz dövriyyəsi zamanı əldə edilən pul vəsaitlərinin nağdlaşdırılmasında bilavasitə istifadə olunan bank kartları aşkar edilərək götürülüb.
İstintaq zamanı məlum olub ki, saxlanılan şəxslər istintaqla araşdırılan Münəccim və Səxavət adlı İran vətəndaşları ilə narkotikləri Biləsuvar və Qaradağ rayonları ərazisində yol kənarında gizlədilən yerdən satmaq üçün əldə ediblər.
Məsələ ilə bağlı cinayət işi başlanılıb, dəstə üzvləri barəsində həbs qətimkan tədbiri seçilib. Əməliyyat axtarışları davam edir.
