Bakının Səbail rayonunda, “Shaurma №1” kafesində oğurluqda ittiham olunan meyxanaçı Sultanəliyə hökm oxunub. Bu haqda bu gün, 27 oktyabr tarixində Bizim.Media məlumat verib.
Hadisə bu il mayın 18-də baş verib. Sultanəli tanışı Turalın içərisində 513 manat və 1 ədəd idman kartı olan pulqabını oğurlayıb.
İstintaq zamanı məlum olub ki, Tural mayın 21-də dostunun ad günü mərasimi olacağını və Sultanəlinin də həmin məclisdə iştirakını istədiyini bildirib. Bir müddət sonra Tural masadan uzaqlaşıb, və həmin vaxt meyxanaçı pul kisəsini götürərək restoranı tərk edib. Sultanəli ifadəsinin sonunda törətdiyi əməldən peşman olduğunu deyib.
Səbail rayon Məhkəməsinin hökmü ilə ona 11 ay 26 gün müddətinə azadlığın məhdudlaşdırılması cəzası təyin edilib. Təqsirləndirilən şəxs üzərinə hər gün saat 22:00-dan növbəti gün saat 07:00-dək yaşayış yerini tərk etməmək, elektron nəzarət vasitəsini gəzdirmək və həmin vasitənin işlək vəziyyətdə saxlanılması üçün ona xidmət etmək, Bakı şəhərinin ərazi hüdudlarını tərk etməmək, müvafiq məhkəmə qərarı olmadan yaşayış yerini dəyişdirməmək, habelə cəzanın icrasına nəzarət edən orqanı iş yerinin dəyişdirilməsi barədə əvvəlcədən məlumatlandırmaq vəzifələri qoyulub.
