Xətai rayonu, Gəncə prospektində yerləşən 269 saylı tam orta məktəbin həyətindəki irigövdəli ağaclar quruyub və ətrafda yaşayan sakinlər üçün ciddi təhlükə mənbəyinə çevrilib. Bu haqda bu gün, 20 yanvar tarixində Bakuplus.az ATV-yə istinadən məlumat verir.
Ağaclar təxminən 4-5 metr hündürlükdə yaşayış kompleksinin həyətinə şaxələnib. Quruyan ağaclar müxtəlif vaxtlarda sınaraq kompleksin həyətindəki nəqliyyat vasitələrinin üzərinə düşür. Xoşbəxtlikdən bu vaxta qədər kimsə xəsarət almayıb, lakin həm təhsil müəssisəsindən, həm də kompleksdən olan vətəndaşlar məhz buradan hərəkət edirlər, ona görə də təhlükənin baş verməsi qaçılmaz ola bilər.
Məsələ ilə bağlı Bakı Şəhər İcra Hakimiyyətindən bildirildi ki, Təhsil Nazirliyi bununla bağlı İcra Hakimiyyətinə məktub yollamalıdır. Bundan sonra ərazidəki qurumuş ağacları kəsmək mümkündür. Təhsil Nazirliyindən isə problemlə bağlı məlumat vəd edilsə də, telefon zənglərinə cavab verən olmayıb.
